31 августа 2017, 03:58 | 2 329 просмотров
Тәуелсіз еліміздің салт-дәстүрін, әдет-ғұрпын, ғасырлардан сыр шерткен қасиетті мәдени сәулеттік ескерткіштерін, тарихи орындар мен ұлттық өнерді насихаттау мақсатында түркі тілдес елдердің еңбек сіңірген қылқалам шеберлері Шымкентте бас қосты.
Кескіндеме саласы бойынша өзара тәжірибе және пікір алмасуды көздеген топ Оңтүстік Қазақстан облысы әкімдігінің үлкен мәжіліс залында облыстық мәдениет басқармасының басшысы Нұрболат Ахметжановтың қатысуымен «Түркістан – Түркі әлемінің мәдени астанасы» жылы аясындағы ХХ TURKSOY ұйымына мүше елдер суретшілері пленэрі бойынша дөңгелек үстел өткізді. Онда Оңтүстік өңірінің өзіндік табиғи географиялық ерекшеліктері мен көз тартарлық орындарын бейнелейтін халықаралық деңгейдегі өнер шығармаларын жасау, насихаттау мәселесі сөз болды.Алқалы жиынға 9 мемлекеттің, яғни Түркия, Түркіменстан, Өзбекстан, Қырғызстан, Ресей Федерациясы, Украина, Болгария, Молдавия елдерінен 17 суретші, ал елімізден Астана, Алматы, Павлодар, Шымкент қалаларынан 13 кәсіби суретші, Қазақстанның еңбек сіңірген қайраткерлері, ҚР Көркем сурет академиясының мүшелері және өнер профессорлары шақырылды. Дөңгелек үстелде сөз алған облыстық мәдениет басқармасының басшысы Н.Ахметжанов Елбасы Н.Ә.Назарбаевтың «Болашаққа бағдар: рухани жаңғыру» мақаласында көрсетілген «Туған жер» бағдарламасын жүзеге асыруда да аталған шараның маңызы зор екенін жеткізді.