АНА ТІЛІ – АРЫМ, ИМАНЫМ

Мақсаты: Ана тілінің қадір –қасиетін ұрпақ бойына дарыту.

Оқушылардың ойының дамып, дүниетанымдық көзқарасының қалыптасуына, нағыз адам болуы үшін, ана тілінде сөйлеу шеберлігін жетілдіру. Ана тілін қадірлеуге, құрметтеуге тәрбиелеу.

Көрнекілігі: қанатты сөздер, қазақ халқының ұлы ғұламаларына арналған буклеттер, кітап – журналдар, әдеби шығармалар, музыкалық шығармалар.

Түрі: әдеби –сазды қойылым

Барысы:

Кіріспе

Ана тілінің құдіретін қанша айтсақ та түгесу мүмкін емес. Әркім өз тілімен сөйлеуге, анасынан туа үйренген тілмен сөйлесуге тырысуы керек.

Ана тілін қадір тұтпай, өз халқыңды сүйе де алмайсың.

1 – жүргізуші: Армысыздар, қадірлі ұстаздар мен оқушылар!

«Ана тілі – арым, иманым атты тәрбие сағатын бастаймыз.

«Кіршіксіз қардай сақтаңдар,

Қазақтың тілін ғаламат.

Ана тілі –арым, иманым,

Аманат, саған, аманат!

2 – жүргізуші: Тіл –қасиетті, құдіретті , киелі. Бұл қасиеттер бойға ананың ақ сүтімен дариды. Тіл өшпейді, қандай қиындықтар да тіл өз ұрпағының, қанына, жанына өз ұрығын егіп, өміршең күй кеше береді.

1 – жүргізуші:

Артында аталы сөз қалдырған, қазақ руларының басын біріктіріп жоңғар – қалмақ шапқыншылығына қарсы халық майданын құрған Тәуке ханның кеңесшілері, көмекшілері болған билер Төлеби , Қаз дауысты Қазыбек би, Әйтеке биді ортаға шақырайық.

Көрініс көрсетіледі . Музыка ойналып тұрады.

3 – оқушы: Ежелден –ақ еліміз ірі, іргелі,

Шежіреміз, тарихымыз ілгері.

Менің тілім –Қаз дауысты Қазыбек,

Әйтеке мен Төле бидің тілдері.

1 – жүргізуші: Тілім менің!

Тіршілігім, тынысым, құным менің!

Бас бергенмен Махамбет тіл берген жоқ,

Тіл кесілсе не болмақ, күнім менің.

2 – жүргізуші: Тілім менің!

Тұтастығым, елдігім, үйім менің!

Ел қорғаған ерлерге рух берген,

Осы тілде толғады биім менің.

1 – жүргізуші: Тілім менің!

Ұлы Абайдай, Мұхтардай пірім менің!

Тұнығым, рухани жан азығым,

Ол бұзылса, менің де бүлінгенім.

2 – жүргізуші: Тілім менің!

Тілім үшін мың өліп, тірілді елім.

Аралыммен, арыммен қатар қойды.

Тілді қорғау – парызым бүгін менің.

«Ананың тілі» әні орындалады.

1 – жүргізуші: Қазақ елінің қайта жаңғырып, маңдайы жарқырап, бағы жануы –рухани таза, адамгершілік мұралардан нәр алуында. Ата – бабалар тәлімін қастерлеп, ұлттық иірімдерінің небір шұрайлысын халықтың мұралардан іздестіруінде.

Бүгінгі ұрпақ жеті атасын, тегінің кім екенін білмегенді былай қойсын, ана тілінде сөйлеу –артта қалушылық деп ұқты-ау.

«Шала қазақ» пен «қара қазақ» айтысы.

(Домбырамен әндете айтуға болады)

«Шала қазақ» : Бейбіт елде болмаса да қатал күн,

Бейқам жүріп «шала қазақ» атандым.

Арғы тегін анық білмей атамның,

Ар намыссыз «шала қазақ» атандым.

Қара қазақ: Ұят болар, шала қазақ атанба

Жүрген жоқсың алыс елде, жапанда

Осы менің саған айтар ақылым,

Осы менің саған берер батам да.

1 – жүргізуші: Ғ.Мүсірепов «Ана тілін ұмытқан адам өз халқының өткенінен де, болашағынан да қол үзеді» - деген екен.

Ендеше алаштың біртуар ақылман Абайы: «Естілердің айтқан сөздерін ескеріп жүрген кісі өзі де есті болады» - деп тегін айтпаған.

Кезекті ана тілі туралы айтқан ақын – жазушыларымыздың өлең жыр - шумақтарына берейік.

«Ана тілі» әні орындалады.

2 – жүргізуші: Тілі нәрсіздің ойы нәрсіз. Тіл жүректің түбіндегі ойды қайталайды. Құнды сөз құнарлы ойдан шығады демекші, халық тілі – тарих шекарасынан әлде қайда әріректен басталады.

Сондықтан күллі рухани тіршілігімізде еш уақытта солмайтын және өмір бойы қайталап шешек атып тұратын тамаша гүлі – ана тілімізді сақтайық, құрметтейік.

1 – жүргізуші: «Анамыздың ақ сүтімен бойымзға дарыған тілімізді ұмыту – бүкіл ата – бабамызды, тарихымызды ұмыту» - деп батыр атамыз Бауыржан Момышұлы айтқандай, тілімізді қадірлейік достар!

«Туған жер» атты әнмен аяқталады.

Қорытынды:

Шермұхан Ләззат:

Туған жылы: 21.06.1961 жыл

Білімі: Жоғарғы, Абай атындағы Қаз Пи, 1986 ж бітірген

Мамандығы: Тарих пәнінің мұғалімі

Еңбек өтілі: 31 жыл

Санаты: І санатты ,

13 категория