Маған жақсы мұғалім бәрінен де артық, өйткені мұғалім мектептің жүрегі!
Республикалық апталық газеті

Алматы облысында БАҚ қызметкерлері марапатталды


29 июня 2021, 11:05 | 1 383 просмотра



Бүгін облыс әкімі Амандық Баталов бұқаралық ақпарат құралдары қызметкерлері күніне орай Талдықорғандағы Салтанат сарайында журналистер қауымымен кездесу өткізді. Дөңгелек үстел басында пікір алмасып, өңірдегі бірқатар тілшілерге мемлекеттік марапаттар тапасырды, деп хабарлайды Алматы облысы әкімінің баспасөз қызметі.

Жиынды бастамас бұрын келушілерге журналистердің тынымсыз тіршілігі жайлы көрме ұсынылып, экраннан бейнефильм көрсетілді. Фильмде өткен бір жыл ішінде бақилық болған белгілі журналистер және ақпарат саласы мамандарының есімдері мен еңбектері аталып өтілді. Жиналған қауым танымал тележүргізуші, «Жетісу» телеарнасынының басшысы болған Бейсен Құранбек, ҚР Мәдениет қайраткері, Журналистер Одағы мен «Алтын Жұлдыз» сыйлығының иегері Нұртілеу Иманғали, ішкі саясат саласының ардагерлері Гүлжиян Сүлейменова, Ғалым Жазылбеков, қаламгер-журналист Мұхаметәлі Қазбанбетов сынды азаматтарды бір минут үнсіздікпен еске алды.

Салтанатты шараны құттықтау сөзімен жалғаған облыс әкімі Амандық Баталов Тәуелсіздіктің 30 жылдығы қарсаңында мереке күні кездесіп отырғанына қуанышты екенін жеткізіп, БАҚ-тың қоғам өміріндегі рөліне тоқталды. Жетісу өңірінің жаңалықтарына жаршы болып жүрген тілшілердің есімдерін атап, республикалық БАҚ өкілдеріне әріптестік байланыстары үшін ризашылығын білдіріп, ізгі тілегін айтты:

- Құрметті журналистер! Қадірлі бұқаралық ақпарат құралдарының өкілдері! Сіздерді кәсіби мерекелеріңізбен шын жүректен құттықтаймын. Қаламдарыңыз қарымды, еңбектеріңіз жемісті болсын! Ақпарат құралдары мемлекеттік саясатты, жүргізіліп жатқан ірі реформаларды, рухани жаңғыру қадамдарын халыққа жеткізуде зор қолдау көрсетіп келеді. Бүгінгі таңда медиа-кеңістіктің ауқымы ұлғайды. Осы 30 жыл ішінде мақтануға тұратын, тәуелсіздікті нығайтып, бүкіл әлемге паш етуге лайықты ауқымды істер жасалды. Тарихи оқиғалар, тағылымды істердің бұқаралық ақпаратта жариялануында сіздердің еңбектеріңіз мол. Жанкешті жұмысты,  шығармашылық зор қабілетті талап ететін жауапты қызметтеріңіз табысты болсын! – деді өз сөзінде А. Баталов.

Мұнан соң «Қазақ газеттері» серіктестігінің бас директоры Шамшидин Паттеев, «ТенгриНьюс» сайтының бас директоры Сұңқар Қарабалин, ұзақ жылдар «Хабар» агенттігінің Алматы облысындағы меншікті тілшісі болған ардагер журналист, қазақ телевизиясының мэтрі Тілеуқабыл Мыңжасар,  Көксу ауданы мәслихатының депутаты, «Нұрлы Көксу» газетінің бас редакторы Айгүл Айманбекова да салтанатты шарада әріптестерін құттықтап, арнайы қабылдау үшін ризашылықтарын білдірді.

Марапаттау рәсімі атқарылып, бірқатар журналистер, ардагер қаламгерлер, өңірлік баспасөз қызметінің өкілдері облыс әкімінің қолынан наградалар алды. Мәселен, «Іле таңы» газеті редакторының орынбасары Роза Айдарбекова мен «Жетісу»  газетінің меншікті тілшісі Қанат Біржансал «Еңбек ардагері» төс белгісімен марапатталады. «Огни Алатау» газетінің меншікті тілшісі  Рамазан Елешевке Қазақстан Республикасының  Құрметті журналисі атағы берілді. Сол сияқты өзге де қалам иелеріне «Ақпарат саласының үздігі» төс белгісі, Қазақстан Республикасы Ақпарат және қоғамдық даму министрінің Құрмет грамотасы, облыс әкімінің Құрмет грамотасы мен Алғыс хаты тапсырылды.

Автор:
Алматы облысы әкімінің баспасөз қызметі