2023 жылдан бері еліміздің барлық мемлекеттік білім беру ұйымдарында жүзеге асырылып келе жатқан «Адал азамат» біртұтас тәрбие бағдарламасы балалардың мінез-құлқына оң әсерін тигізіп, ата-аналар мен мектеп арасындағы ынтымақтастықты жаңа деңгейге көтерді.
Бағдарлама аясында ата-аналарға арналған педагогикалық қолдау көрсету орталықтары құрылып, отбасылық тәрбие мен мектептің өзара әрекеттестігін нығайтуға бағытталған. Бұл орталықтар ата-аналарды баланың тәрбиесі мен оқу процесіне тартумен қатар, психологиялық және педагогикалық көмек көрсетуді де мақсат етеді.
2025 жылдың басынан бері орталықтарға 1,4 миллионнан астам ата-ана тіркеліп, 108 мыңнан астам дәріске қатысқан. Сабақтар мектеп жасына дейінгі балалардан бастап жасөспірімдердің мінез-құлықтық ерекшеліктеріне дейінгі өзекті тақырыптарды қамтыған.
Халықаралық зерттеулердің нәтижелері (PIRLS, TIMSS) көрсеткендей, ата-аналардың баланың оқу процесіне белсенді қатысуы оның оқу жетістіктеріне тікелей әсер етеді. Мысалы, ата-аналары жүйелі түрде баласына көңіл бөлетін оқушылардың нәтижелері басқа оқушыларға қарағанда 16–110 баллға жоғары болған.
Бағдарлама нәтижелері бойынша:
- Ата-аналардың мектеппен байланысы 42%-дан 82%-ға дейін артты;
- 82% мұғалімдер сынып жетекшілерінің кәсіби дамуының артқанын атап өтті;
- 84% оқушылардың оқу белсенділігі жоғарылағанын айтты;
- 71% мектеп пен ата-аналар арасындағы өзара әрекеттестіктің жақсарғанын растады;
- 89% ата-ана бағдарламаның балалардың тәртібіне оң әсер бергенін мәлімдеді.
Бұл туралы Ы.Алтынсарин атындағы Ұлттық білім академиясы вице-президенті Анар Тәңірбергенова мәлімдеді.
Қазіргі уақытта Оқу-ағарту министрлігі бағдарламаны жетілдіру бағытында жұмыс жүргізуде. Атап айтқанда, ата-аналарға арналған орталықтардың тиімділігін арттыру үшін әдістемелік ұсынымдар әзірленіп жатыр. Бұл ұсыныстар ата-ана, мұғалім және оқушы арасындағы ортақ түсіністік пен сенімді қалыптастырып, оқу-тәрбие процесін сапалы ұйымдастыруға негіз болады.
