Автор:
Аишева Кенжегуль Жаксылыковна
Қазақ тілі және әдебиет пәні мұғалімі
Қостанай облысы әкімдігі білім басқармасының «Жітіқара ауданы білім бөлімінің Абай атындағы мектеп-лицейі» коммуналдық мемлекеттік мекемесі
Цифрлық білім беру кеңістігінің дамуы мұғалімдерге дәстүрлі сабақ беру әдістерінен тыс, жаңа технологияларды қолдануға мүмкіндік беріп отыр. Соның бірі — TopIQ білім беру платформасы. Бұл платформа оқушылардың ойлау қабілетін дамытып, пәнге деген қызығушылығын арттыратын, білімді заманауи тәсілмен ұсынатын тиімді құрал ретінде танылуда. Қазақ тілі сабағында TopIQ платформасмын қолдану — білім беру үрдісін жандандырып, оқушылардың тілдік құзыреттілігін дамытуға үлкен үлес қосады.
TopIQ платформасының мазмұны және артықшылықтары
TopIQ — бастауыш және орта буын оқушыларына арналған, түрлі пәндер бойынша білімді бекітуге және тексеруге арналған онлайн платформа.
Оның басты ерекшеліктері:
Қызықты, интерактивті тапсырмалар (тесттер, пазл, сәйкестендіру т.б.);
Пайдаланушыға ыңғайлы интерфейс;
Уақыт үнемдеу және жедел кері байланыс;
Оқушының білім деңгейін автоматты түрде бағалау;
Оқу материалдарының жүйелі берілуі.
Қазақ тілі сабағында тиімді қолдану жолдары:
1. Білімді бекіту
Сабақтың соңында жаңа тақырып бойынша түсінікті бекіту үшін платформадағы тесттік тапсырмаларды қолдануға болады. Мысалы, «Сөз таптары» тақырыбынан кейін оқушыға 5–10 тапсырмадан тұратын тест беру арқылы білімін тексеруге болады.
2. Деңгейлік тапсырмалар беру
TopIQ жүйесінде тапсырмалар күрделілік деңгейіне қарай жасалған. Мұғалім әр оқушының деңгейіне сай тапсырма таңдап, саралап оқытуға қол жеткізеді.
3. Үй тапсырмасы ретінде
Оқушыларға үйде орындауға арналған тапсырмалар беру арқылы олардың жауапкершілігін арттыруға болады. Мұғалім нәтижесін жүйе арқылы бақылап, талдау жасай алады.
4. Диктант пен мәтінмен жұмыс
Платформада мәтіндік тапсырмалармен жұмыс істеуге де мүмкіндік бар. Оқушылар сөздердің жазылуын, тыныс белгілерін, грамматикалық құрылымын меңгере түседі.
5. Қалыптастырушы бағалау жүргізу.
Қалыптастырушы бағалау тапсырмаларын платформа көмегімен ұйымдастыруға болады. Бұл мұғалімнің уақытын үнемдеп, оқушының нақты қай тұстан қиналатынын анықтауға көмектеседі
Нәтиже мен тиімділігіне келетін болсақ, TopIQ платформасын қолдану оқушылардың қазақ тіліне деген қызығушылығын арттырып, пәнді тереңірек меңгеруіне жол ашады. Мұғалім үшін — ыңғайлы бақылау мен бағалау құралы, оқушы үшін — ойын арқылы білім алуға жол ашатын заманауи әдіс. Сонымен қатар, бұл цифрлық платформа оқу процесін жаңғыртуға, цифрлық сауаттылықты арттыруға ықпал етеді.
Қорытындылай келе, TopIQ — заман талабына сай құрылған, қазақ тілі сабағында тиімді қолдануға болатын платформа. Оны дұрыс әрі жүйелі пайдалану арқылы мұғалім сабақ сапасын арттырып, оқушының тілді меңгеру қабілетін жаңа деңгейге көтере алады. Сондықтан TopIQ — болашақ білім беру технологиясының сенімді серігі.