Kozybayev University студенттері Амир Агзамов пен Даниил Герасимов Сауд Арабиясындағы King Abdullah University of Science and Technology (KAUST) ұйымдастырған Visiting Student Researcher Program бағдарламасының финалынан сәтті өтіп, халықаралық ғылыми стажировкаға жолдама алды.
Олар биыл жазда KAUST университетінде екі айлық ғылыми тағылымдамадан өтеді. Бұл жоғары оқу орны — агрогеномика саласындағы әлемдік көшбасшылардың бірі саналады.
Амир мен Даниил KAUST профессоры Джесси Полландтың зертханасында жұмыс істеп, бидайдың геномдық селекциясы бойынша тәжірибе жинақтайды. Бұл бағыт — Солтүстік Қазақстанның ауыл шаруашылығы мен елдің азық-түлік қауіпсіздігі үшін аса маңызды.
Амир Агзамов — University of Arizona микрокампусының СҚО-дағы амбассадоры, бұған дейін Сингапур мен Токиода тәжірибеден өткен. Даниилмен бірге олар — қазақстандық ғылыми жастардың жаңа буынының жарқын өкілдері. Олар қазіргі таңда-ақ халықаралық зерттеу экожүйесіне еніп, өз әлеуетін жаһандық деңгейде көрсетіп жүр.
Мұндай мүмкіндіктердің жүзеге асуы Kozybayev University, University of Arizona және KAUST арасындағы тұрақты ғылыми серіктестіктің арқасында мүмкін болып отыр. Бұл бастама жоғары деңгейде қолдау тапты: атап айтқанда, агрогеномика саласындағы жетекші сарапшы профессор Род Винг Қазақстан Республикасының ғылым және жоғары білім министрі Саясат Нұрбекпен аграрлық ғылымды дамыту болашағын талқылаған болатын. Бұл кездесу осындай халықаралық ынтымақтастыққа тың серпін берді.