«Құлақтан кіріп бойды алар, жақсы ән мен тәтті күй.
Көңілге түрлі ой салар, әнді сүйсең менше сүй!»
Абай
Елімізде алғаш рет ҚР Оқу-ағарту министрлігінің ұйымдастыруымен Халықаралық балаларды қорғау күніне арналған қазақ тіліндегі «Әншуақ» балалар әндері фестивалі өтеді. Бұл өскелең ұрпақтың мәдени өміріндегі бірегей оқиға. Фестивальдің басты мақсаты — халқымыздың ұлттық колориті мен рухани мәдениетін дәріптеу.
Фестиваль аясында 9 қыркүйектен бастап Жетісу облысының түкпір-түкпіріндегі жалпы білім беру мекемелері мен қосымша білім беру мекемелерінде білім алып жатқан балалар әндерінің челленджі басталады. Оған 6-18 жас аралығындағы солистер, дуэттер, трио, квартеттер, хор ұжымдары қатыса алады. Ол үшін #ӘНШУАҚ жалпы хэштегінің астында TikTok әлеуметтік желісінде балалар әндерінің тікелей орындалуының бейнесін орналастыру қажет. Қорытындысы 1 маусым күні Халықаралық балаларды қорғау күнінде шығарылады.
Сондай-ақ, бұл күні еліміздің әрбір елді мекенінде «Open Air» форматында концерттер, ал елорданың өзінде «Әншуақ» фестивалінің гала-концерті өтеді. Гала-концерттің барлық қатысушылары дипломдармен, бағалы сыйлықтармен, «Балдәурен» республикалық оқу-сауықтыру орталығына жолдамалармен марапатталады.
Фестивальдің бірегейлігі — ол еліміздің рухани байлығының парағы, және ең бастысы, ол өскелең ұрпақтың бойында дәстүрлі тарихи, рухани рух негізінде орнықты адамгершілік сенімдерді тәрбиелеуге бағытталған.
Автор: Сабит Толыбеков
Жетісу облысы білім басқармасының Дене тәрбиесі,
спорт, алғашқы әскери дайындығы және қосымша білім берудің ғылыми-тәжірибелік
орталығы көркем эстетикалық шығармашылықты дамыту бөлімінің әдіскері